संसद विघटनविरुद्ध बृहत नागरिक आन्दोलनको टुँडिखेलमा मार्च
काठमाडौं । बृहत नागरिक आन्दोलनले शुक्रबार काठमाडौंको टुँडिखेलमा टुँडिखेल मार्च आयोजना गरेको छ । प्रतिनिधिसभा विघटनको विरुद्धमा बृहत नागरिक आन्दोलनले टुँडिखेल मार्चको आयोजना गरेको हो ।
रत्नपार्कबाट सुरु भएको मार्च भद्रकाली, सहिदगेट हुँदै टुडिखेलको गेट अगाडि रहेको संकटा मन्दिरमा पुगेर कोणसभामा परिणत भएको थियो । मार्चका सहभागीहरुले ‘जनताको हो टुुँडिखेल’, ‘टुँडिखेल फिर्ता गर’, ‘नागरिक आन्दोलन सफल पारौं’, ‘गणतन्त्र जिन्दावाद’, लेखिएका प्लेकार्ड बोक्नुका साथै नारा लगाएका थिए ।
त्यसक्रममा उनीहरुले संसद विघटनविरुद्ध व्यङ्ग गर्दै कतिवा वाचन र कार्टुन प्रदर्शनसमेत गरेका थिए । मार्चपछि बृहत नागरिक आन्दोलनले आजै ‘नागरिक घोषणापत्र २०७७’ समेत जारी गरेको छ । घोषणा पत्रमा लोकतन्त्रलाई जीवन्त बनाउन राजनीतिक दलहरुले संवैधानिक संस्कार आत्मसात गर्न नसकेको उल्लेख छ ।
