केपीले पश्चताप गरेर पछि नहटे ठूलो जनआन्दोलनः प्रचण्ड
काठमाडौं । नेकपाको प्रचण्ड-नेपाल समूहका अध्यक्ष पुष्पकमल दाहाल प्रचण्डले आफूहरुको आन्दोलन थप सशक्त हुने बताएका छन् ।
बिहीबार आमहड्तालका क्रममा सडकमा प्रदर्शनमा निस्केका अध्यक्ष प्रचण्डले आजको आमहड्ताल यसको सुरुवात मात्र भएको बताए । उनले माघ २८ गते काठमाडौंमा सशक्त विरोध प्रदर्शन हुने र फागुन पहिलो सातादेखि संयुक्त जनआन्दोलन सुरु हुने बताए ।
उनले नेपाली कांग्रेस, जनता समाजवादी पार्टी र नागरिक समाजसँग संयुक्त आन्दोलनका लागि छलफल भइरहेको जानकारी दिए । उनले प्रधानमन्त्री केपी शर्मा ओली पश्चाताप गरेर नआए आन्दोलनबाटै निरंकुशताको अन्त्य गर्ने चेतावनी दिए ।
उनले अहिलेको लडाइँ केपी ओली र प्रचण्ड तथा माधव नेपाल र ओलीबीच नभई प्रतिगमनविरुद्ध भएको बताए । उनले नागरिक समाज, पत्रकार, विभिन्न संघसंस्था प्रतिगमको विरोधमा सडकमा आएकाले प्रतिगमन परास्त हुने उनको भनाई थियो ।
