पार्टीमा विधि पद्धतिको उपेक्षा र अवज्ञा हुन नपाओस्ः नारायणकाजी श्रेष्ठ

नारायणकाजी श्रेष्ठ ।
प्रतिनिधिसभा विघटनको असंवैधानिक एवं प्रतिगामी कदमकाविरुद्ध हाम्रो पार्टीद्वारा शुक्रबार राजधानीमा आयोजित बिरोध प्रदर्शन तथा सभा बिशाल जनसहभागितासहित भव्यरुपमा सफल भयो । छिट्टै अर्को चरणको संघर्षको कार्यक्रम घोषणा गरिनेछ । केपी ओलीजी सँगको शुरुदेखिको हाम्रो एउटा मुख्य मतभेद विधि र पद्धतिको पालनामा हो ।

अब हामीले पार्टी निर्माण र परिचालनमा प्रारम्भदेखि नै पद्धतिसम्मत ढङ्गले अघि बढ्न ध्यान दिनु पर्दछ । त्यसको निम्ति संघर्ष गर्नुपर्दछ । तव मात्र हामी आफ्नो प्रतिवद्धताप्रति इमान्दार हुन सक्दछौं र पार्टीलाई सही दिशामा अघि बढाउन सक्षम हुनेछौं । हाम्रो हिजोको कार्यक्रमको क्रममा मञ्चमा देखिएको विवाद यही बिषयमा हो । जुलुस परिक्रमा र सभा शुरु गर्ने सम्बन्धमा केन्द्रीय संघर्ष समितिले बनाएको पूर्वनिर्धारित योजना संघर्ष समितिको जानकारी बिना नै अकस्मात परिवर्तन गरियो । त्यसो गरिनु हुँदैनथियो ।

संस्थागत कार्य प्रणालीको बारेमा सबै नेतृत्वदायी कमरेडहरुको गम्भीर ध्यानाकर्षणका लागि त्यतिबेला नै जोडले कुरा उठाउनु जरुरी थियो । विधि पद्धतिको उपेक्षा र अवज्ञा हुन नपाओस् भन्नेमा हामीले शुरुदेखि सशक्त संघर्ष गर्नुपर्दछ । ख्याल गरौं, हाम्रो अबको एउटा मुख्य चुनौति हिजो हामीले कुरा उठाए अनुसार बिधि पद्धति अनुसार पार्टी सञ्चालन गर्नु हो ।