पूर्वजनमुक्ति सेनालाई ओलीको आश्वासनः नेतृत्वबाट विगतमा जस्तो धोका पाउनुहुने छैन
काठमाडौं । प्रधानमन्त्री केपी शर्मा ओलीले पूर्वजनमुक्ति सेनाको त्याग र योगदानको सम्मान गर्ने बताएका छन् ।
शनिबार प्रधानमन्त्री निवास बालुवाटारमा पूर्वजनमुक्ति सेनालाई बोलाएर प्रधानमन्त्री ओलीले विगतमा नेतृत्वले तपाईंहरुको भावनालाई दुरुपयोग गरेको भन्दै आफूले सम्मान गर्ने बताएका हुन् ।
भेटपछि प्रधानमन्त्रीका प्रेस सल्लाहका सूर्य थापाले लेखेका छन्, ‘पूर्व जनमुक्ति सेनाका कमाण्डरहरूसँग प्रधानमन्त्री तथा पार्टी अध्यक्ष केपी शर्मा ओलीले आज बालुवाटारमा आयोजित भेटघाटका क्रममा सम्बोधन गर्दै भन्नुभएको छ, ‘जनयुद्धको अवधिमा तपाईंहरूको योगदान, त्याग, बलिदान र क्रान्तिको सपनाप्रति सम्मान छ । नेतृत्वले तपाहरूका भावनाको दुरूपयोग गर्यो । यो तथ्य बुझेर यहाँहरू जुन निष्कर्षमा आइपुग्नुभयो, यो एकदमै सही छ । यसरी आइरहँदा तपाईहरू ढुक्क हुनुहोस्, हामी राजनीतिक रूपमा समस्याको वास्तविक समाधान गर्छाैं । नेतृत्वबाट विगतमा जस्तो धोका पाउनुहुने छैन ।’