केपी ओली राजनीतिक क्यान्सर हुन्ः बाबुराम भट्टराई
काठमाडौं । पूर्वप्रधानमन्त्री डा. बाबुराम भट्टराईले प्रधानमन्त्री केपी शर्मा ओलीलाई राजनीतिक क्यान्सरको संज्ञा दिएका छन् । बुधबार नेकपाको प्रचण्ड–नेपाल समूहले काठमाडौंमा गरेको कार्यक्रममा भट्टराईले ओलीले कसैको मतियार भएर संसद विघटन गरेकाले उनलाई सडक आन्दोलनबाटै हटाउनुपर्ने बताएका हुन् । भट्टराईले प्रधानमन्त्री ओली इमान्दार तानाशाह भएको समेत बताए ।
उनले ओलीले झापा आन्दोलनमा राम्रो काम गरेपनि पछि जेलबाट निस्किएर आएपछि अग्रगमनको विरोधी बनेर आएको बताए । भट्टराईले ओलीको यस कदमलाई सामान्य अर्थमा नलिनसमेत आग्रह गरे । संयुक्त आन्दोलनबाट मात्र ओलीलाई विस्थापित गर्न सकिने भन्दै उनले ओलीले चुनाव गराउँछन् भन्ने भ्रम नपाल्न कांग्रेसलाई आग्रह गरेका छन् ।
उनले संविधान र व्यवस्थामाथि नै कू गर्ने ओलीलाई नेकपाबाट निस्कासन नगरेको भन्दै प्रचण्ड नेपाल समूहप्रति आशंका व्यक्त गरेका छन् । उनले भने, ‘ निरंकुशता लाद्ने यस्तो व्यक्तिलाई तपाईँहरुले अझै पार्टी निकाल्नु भएको छैन । कतै तपाईँहरु भोलि फेरि मिल्ने हो कि भन्ने सबै आशंका छ । त्यसैले तपाईँहरु यसलाई स्पष्ट पार्नुस् ।’
