राष्ट्रपतिविरुद्ध अपमानजनक अभिव्यक्ति दिनेमाथि कारबाही गर्न गृहमन्त्रीको निर्देशन
काठमाडौं । गृहमन्त्री रामबहादुर थापाले राष्ट्रपति विद्यादेवी भण्डारीप्रति राजनीतिकर्मीहरुले नै अशोभनीय, अमर्यादित रुपमा गालीगलौज गरेकोप्रति मन्त्रालयको ध्यानाकर्षण भएको बताएका छन् ।
गृह मन्त्रालयमा अखिल नेपाल महिला संघले बुझाएको ज्ञापनपत्र बुझ्दै गृहमन्त्री थापाले अमर्यादित ढंगले राष्ट्रपतिको नाम लिनु दुःखद भएको भन्दै त्यसमा संलग्नलाई कारबाही गर्न निर्देशन दिएको बताए ।
राष्ट्रपति जस्तो सम्मानित संस्थाप्रति अपमानजनक अभिव्यक्ति दिनु निन्दनीय कार्य भएको भन्दै त्यस्तो कार्यमा संलग्नहरुलाई छानविन गरी कारवाही गरिने उनले बताए । अखिल नेपाल महिला संघले पछिल्लो राजनीतिक घटना क्रमसँग जोडर राष्ट्रपतिको चरित्रहत्या गर्नेगरी अमर्यादित र अशिष्ट भाषा प्रयोग गरी गलत प्रचार गरिएको भन्दै आपत्ति प्रकट गर्दै गृह मन्त्रीको ध्यानाकर्षण गराएको हो ।