संसद विघटनबिरुद्ध पुस १३ गते देशभर प्रदर्शन गर्ने कांग्रेसको निर्णय
काठमाडौं । प्रमुख प्रतिपक्षी दल नेपाली कांग्रेसले संसद विघटनको कदमबिरुद्ध आन्दोलन गर्ने निर्णय गरेको छ । पार्टी कार्यालय सानेपामा बिहीबार बसेको केन्द्रीय कार्यसमितिको बैठकले प्रधानमन्त्री केपी शर्मा ओलीको संसद् विघटनको कदमविरुद्ध प्रदर्शन गर्ने निर्णय गरेको प्रवक्ता विश्वप्रकाश शर्माले जानकारी दिए ।
पहिलो चरणमा सांकेतिक विरोधको तयारी गरेको कांग्रेसले यही पुस १३ गते देशभरका १६५ निर्वाचन क्षेत्र केन्द्रित आन्दोलन गर्न लागेको हो । प्रवक्ता शर्माका अनुसार आगामी १३ गते देशभरका संघीय निर्वाचन क्षेत्रमा केन्द्रित हुनेछ ।
उनले प्रधानमन्त्री केपी शर्मा ओली नेतृत्वको सरकारको सिफारिसमा भएको प्रतिनिधिसभा विघटनको कदम असंवैधानिक एवं अलोकतान्त्रिक भएको भन्दै आन्दोलनका बिषयमाा पार्टीभित्र कुनै विवाद नरहेको बताए ।
उनले आन्दोलनका बिषयमा पार्टीसभापति शेरबहादुर देउवा र बरिष्ठ नेता रामचन्द्र पौडेलबीच कुनै मतभिन्नता नरहेको पनि स्पष्ट पारे । कांग्रेसले पुस १६ गते राष्ट्रिय मेलमिलाप दिवसका अवसरमा देशभर कार्यक्रम गर्ने यसअघि नै तय गरिसकेको छ । बैठकमा केन्द्रीय सदस्यहरुले धारणा राख्ने क्रम जारी रहेको उनले बताए ।
