बुटवल उपमहानगरका तीन अधिकृतसहित थप १६ जनामा कोरोना संक्रमण

बुटवल । बुटवल उपमहानगरपालिकाका तीन जना अधिकृतसहित रुपन्देहीमा आइतबार १६ जना कोरोना भाइरसका संक्रमित थपिएका छन् ।
उपमहानगरपालिकाका स्वास्थ्य महाशाखा प्रमुख कुन्दनकुमार सिंहका अनुसार संक्रमित हुनेमा उपमहानगरपालिकाका दुईजना शाखा प्रमुख हुन् भने र एकजना अधिकृत स्तरका सहायक शाखा प्रमुख हुन् ।

त्यस्तै कोरोना पुष्टि भएका बाँकी १३ जना वडा नम्बर ११ कालिकानगर र देवीनगरका रहेका सिंहले जानकारी दिए । देवीनगर र कालिकानगरका १३ जना संक्रमित पनि पारिवारिक नातेदार भित्रका रहेका उपमहानगरपालिकाले जनाएको छ । बुटवलमा यति धेरै संक्रमित थपिएको आइतबार पहिलो पटक हो ।

योसंगै बुटवलमा कुल संक्रमितको संख्या ८० पुगेको छ । ति मध्ये ५६ जना सक्रिय संक्रमित रहेका छन् भने २४ जना उपचारपछि निको भएर घर फर्किएका छन् । १९ वटा वडा रहेको बुटवलमा वडा नम्बर ११ का १८ जना संक्रमित रहेका छन् ।