कोरोना नियन्त्रणको भावी रणनीति बनाउन प्रधानमन्त्रीले विज्ञहरुसँग छलफल गर्दै
काठमाडौं । लकडाउन खुलेसँगै कोरोना संक्रमितहरुको संख्या बढ्दै गएपछि प्रधानमन्त्री केपी शर्मा ओलीले आज जनस्वास्थ्य विज्ञहरुसँग छलफल गर्दैछन् । कोरोना संक्रमण नियन्त्रणका लागि पुनः लकडाउन गर्ने वा अन्य कुनै उपायहरु अपनाएर कोरोना संक्रमणको जोखिम न्यूनिकरण गर्ने भन्नेबारे प्रधानमन्त्रीले विज्ञहरुसँग छलफल गर्न लागेका हुन् ।
बिहान ११ बजे २० जनाभन्दा बढी जनस्वास्थ्यविद्लाई प्रधानमन्त्री निवास बालुवाटारमा बोलाइएको छ । केही दिनयता समुदायस्तरमा कोरोना संक्रमण देखिन थालेपछि पुनः लकडाउन गर्ने वा जोरबिजोर प्रणाली अपनाउने भन्ने विषयमा सरकारीस्तरमा छलफल समेत सुरु भएको छ । नेपालमा संक्रमितको संख्या २० हजार ७५० पुगिसकेको छ ।