पार्टी स्थायी कमिटी बैठकमा प्रधानमन्त्री ओली अनुपस्थित
काठमाडौँ । प्रधानमन्त्री निवास बालुवाटारमा जारी सत्तारुढ नेकपाको स्थायी कमिटी बैठकमा प्रधानमन्त्री केपी शर्मा ओली अनुपस्थित भएका छन् । शुक्रबार बिहान ११ः२० देखि सुरु भएको दोस्रो दिनको बैठकमा प्रधानमन्त्री ओली उपस्थित नभएका हुन् । ओली उपस्तित नभएपछि बैठक पुष्पकमल दाहाल प्रचण्डले अध्यक्षता गरेर सञ्चालन गरेका छन् ।
बुधबारदेखि सुरु भएको बैठकमा प्रधानमन्त्री ओली र अर्का अध्यक्ष प्रचण्डले आआफ्ना धारणा राखेका थिए । बैठकमा ओलीले आफूलाई पार्टी भित्रैबाट असहयोग भएको बताएका थिए भने प्रचण्डले ओलीलाई प्रधानमन्त्रीमा निरन्तरता दिनु गल्ती भएको बताएका थिए । दोस्रो दिनको बैठकमा ओली अनुपस्थित भए पनि सचिवालयका नेताहरु र स्थायी कमिटीका अन्य नेताहरुले आफ्ना धारणा राखिरहेका छन् ।
बैठकमा तय भएका ७ एजेन्डामा वर्तमान परिस्थिति र स्थायी कमिटीको बैठकका सम्बन्धमा अध्यक्षद्वयको सम्बोधन, कोभिड-१९ को नियन्त्रण, रोकथाम र उपचार, नेपालको सीमा समस्या र समाधान, सरकारको कामको समग्र समीक्षा, पार्टी कामको समीक्षा र सांगठनिक एकताको बाँकी कामहरू सम्पन्न गर्ने, एमसीसी र विविध छन् ।
विविधमा रूकुम घटना, नागरिकता विधेयक र संघीय संसदका सदस्यहरूको भत्ताको विषय समेटिएका छन् । यसअघि पनि प्रधानमन्त्री स्थायी कमिटीको बैठक छाडेर हिंडेपछि बैठक त्यतिकै स्थगित भएको थियो ।
