‘कामरेड ! केक काटेर त्यसमा पनि नेपालको नक्सा बनाएर आमालाई चिराचिरा पार्ने चलन कहाँबाट आयो ?’
काठमाडौं । नेपाल कम्युनिष्ट पार्टीकी नेतृ अष्टलक्ष्मी शाक्यले केक काटेर जन्मदिन मनाउने नेपाली संस्कृति नभएको बताएकी छन् । बिहीबार पार्टीको वागमती प्रदेशस्तरीय प्रशिक्षण भेलामा शाक्यले प्रधानमन्त्री केपी शर्मा ओलीले नेपालको नक्सा राखेर केक काटेको विषयमा जन्मदिन मनाउने परम्परा नेपाली समाजमा भएपनि केक काटेर मनाउने कुरा अहिलेसम्म आफूलाई थाहा नभएको बताएकी हुन् ।
उनले जन्मदिनमा केक काट्नुको सट्टा बत्ती बालेर उज्यालो भविष्यको कामना गर्नु नेपाली संस्कृति भएको बताइन् । उनले भनिन्, ‘केक काटेर जन्मदिन मनाउने चलन हाम्रो संस्कृति होइन। होइन कामरेड! यो। त्यसमा पनि नेपालको नक्सा बनाएर आमालाई चिराचिरा पार्ने काम कहाँबाट आयो। नेपाल भनेको आमा हो। मैले यति मात्रै भन्न चाहेँ।’ केक काटेर खान मन लागे अन्य दिनहरुमा पनि काटेर खान मिल्ने तर जन्मदिनमा बत्ती बालेर र केक काटेर नमनाउन उनले आग्रह गरिन् ।
