गच्छदारको बचाउमा नेपाली कांग्रेसद्वारा सदन र सडकमा आन्दोलन
काठमाडौं । बालुवाटारस्थित ललिता निवासको जग्गा अनियमितता प्रकरणमा पार्टी उपसभापति विजयकुमार गच्छदारविरुद्ध अख्तियारले मुद्दा दायर गरेपछि नेपाली कांग्रेस उनको बचाउमा सदन र सडकमा उत्रिएको छ ।
बिहीबारदेखि सदन अवरुद्ध गरेको कांग्रेसले शुक्रबार पनि त्यसलाई निरन्तरता दिएको छ । शुक्रबारदेखि त भातृसंगठनलाई पनि गच्छदारको बचाउनमा कांग्रेसले सडकमा उतारेको छ । कांग्रेसले शुक्रबार दिउँसो एक बजे गच्छदारको बचाउमा माइतीघर मण्डलमा प्रदर्शन गरेको छ ।
नेविसंघ, तरुण दल लगायतका भातृ संगठनको अगुवाईमा माइतीघरमा विरोधमा उत्रिएका कांग्रेसका नेता कार्यकर्ताले बालुवाटारको जग्गा विक्रीको निर्णय गर्ने पूर्वप्रधानमन्त्री र खरिद गरी लालपूर्जा बोकेर हिँड्ने नेकपाका नेताहरुलाई कारवाही नभएको भन्दै चर्का नाराबाजी गरेका थिए ।
