प्रधानमन्त्रीद्वारा लुम्बिनी केबुलकारको उद्घाटन
बुटवल । बुटवलको बमघाटबाट पाल्पाको तिनाउ गाउपालिका ३ वसन्तपुरडाँडासम्म जोड्ने गरी बनाईएको लुम्बिनी केबुलकारको प्रधानमन्त्री पुष्पकमल दाहाल प्रचण्डले उद्घाटन गरेका छन् ।
बिहीबार प्रधानमन्त्रीले पाल्पाको तिनाउ गाउपालिका वडा नम्बर ३ वसन्तपुरडाँडाँमा रहेको टप स्टेशनबाट केवलकार उद्घाटन गरेका हुन् । केवलकारको उद्घाटन गर्न आयोजित विशेष समारोहमा प्रधानमन्त्रीसँगै पुर्व उपप्रधान तथा अर्थमन्त्री विष्णु पौडेल, लुम्बिनी प्रदेशका प्रदेश प्रमुख अमिक शेरचन, मुख्यमन्त्री डिल्लीबहादुर चौधरी लगायतका नेताहरु, संघीय र प्रदेश सांसदहरु, बुटवल र तिनाउका जनप्रतिनिधिहरु,यस क्षेत्रका उद्योगी व्यवसायी र सर्वसाधारण सहभागी भएका थिए ।
नेपाल उद्योग बाणिज्य संघका अध्यक्ष चन्द्र ढकालसहित रुपन्देहीका उद्योगीहरुको साढे ३ अर्ब लगानीमा निर्मित लुम्बिनी केबलकार लुम्बिनी प्रदेशको पहिलो केबलकार हो ।
बुटवल–३ बमघाटमा बटम स्टेशन र पाल्पाको तिनाउ गाउंपालिका–३ वसन्तपुरमा टप स्टेशन रहेको केबलकारको शिलान्यास तत्कालीन प्रधानमन्त्री केपी शर्मा ओलीले २०७७ फागुन १ गते गरेका थिए । आन्तरिक र भारतीय पर्यटकलाई लक्षित गर्दै बनेको केबलकारको टप स्टेशनमा कामाख्यादेवीको आकर्षक मन्दिर सहितका धार्मिक संरचनाहरु बनेका छन्।
