आजदेखि काठमाडौं उपत्यकामा दशैं तिहार लक्षित सुपथ मूल्य पसल संचालन
काठमाडौं । सरकारले बिहीबारदेखि काठमाडौं उपत्यकामा दशैं तिहार लक्षित सुपथ मूल्य पसल सञ्चालनमा ल्याएको छ । हरेक वर्षजस्तै यस वर्ष पनि दशैं, तिहार र छठ पर्वहरुलाई लक्षित गरी खाद्य व्यवस्था तथा व्यापार कम्पनी लिमिटेड र साल्ट ट्रेडिङ्ग कर्पोरेशन लिमिटेडका देशभर रहेका कार्यालय, डिपो, डिलरहरुका साथै घुम्ती सेवा पसल एवं अनलाइनमार्फत् सहुलियत पसल संचालन गरेको हो ।
उपत्यकामा बिभिन्न ५ स्थान थापाथली, रामशाहपथ, ललितपुरको प्रयागपोखरी, लगनखेल र भक्तपुरमा खाद्य व्यवस्था तथा व्यापार कम्पनी लिमिटेडले सुपथ मूल्य पसल सञ्चालन गरेको कम्पनीका बाग्मती प्रदेश बिक्री प्रमुख रणबहादुर बुढाथोकीले जानकारी दिए ।
सहुलियत पसलमा चामलमा प्रतिकिलो ५ र कर्णालीको सिमीमा प्रतिकिलो १० रुपैयाँ छुट दिइएको छ । त्यस्तै उनले दशैंका लागि खसीबोका ल्याउनका लागि प्रक्रिया सुरु गरिरहेको भन्दै घटस्थापनाको केही दिन अघि खसीबोका ल्याइ बिक्रीबितरण गरिने बताए । सुपथ मूल्य अनुसार र नुन प्रतिकिलो १८ रुपैयाँका दरले एउटा परिवारलाई ४ किलो मात्रै खरिद गर्न मिल्ने व्यवस्था गरिएको छ ।
त्यस्तै चिनी ७० रुपैयाँ प्रतिकेजीका दरले प्रति परिवार ४ केजीका दरले खरिद गर्न पाउने व्यवस्था मिलाइएको छ । त्यस्तै घ्युको मूल्य सकारले ८ सय ७० रुपैयाँ प्रतिलिटर निर्धारण गरेको छ । दालमा प्रतिकेजी ५ रुपैयाँ, फाँपर, तितेफापर, केराउमा प्रतिकेजी ५ रुपैयाँका दरले छुट दिइने कम्पनीले जनाएको छ ।
