बजारमा खाद्य बस्तुसँगै राखेर झिँगा साङ्ला मार्ने रसायनजन्य सामान बिक्री गर्ने गरेको फेला
काठमाडौं । काठमाडौंका अधिकांश खाद्य स्टोरमा म्याद गुज्रेका वा अन्य कारण बिग्रेर फिर्ता गर्नुपर्ने सामान राख्न छुट्टै ठाउँको व्यवस्था नगरिएको पाइएको छ । महानगरको उपभोक्ता हित संरक्षण समितिले गरिरहेको नियमित अनुगमनका क्रममा यो अवस्था देखिएको हो ।
दालका रुपमा प्रयोग गरिने कतिपय दाल र गेडागुडी, काजु, किसमिस, छोकडालगायतका मसला कहिले कसले प्याकेजिङ् गरेको हो ? उपभोग्य मिति कहिलेसम्म हो, उल्लेख गरेको पाइएन ।
चिउरा, म्याक्रोनी, पास्ताजस्ता सामाग्री बोराबाट निकालेर आफैं प्याकेट बनाउने तर उपभोग गर्न हुने मिति उल्लेख नगर्ने जस्ता समस्या देखिएको छ । यस्ता कुरामा उपभोक्ताले पनि ध्यान दिएको नदेखिएको अनुगमनका क्रममा पाइएको छ । भदौ २७ र २८ गते चाबहिल क्षेत्रमा भएका होलसेल र खुद्रा खाद्यान्न पसलको अनुगमनका क्रममा भेटिएको साझा समस्या हो । त्यस्तै अनुगमनका क्रममा उपभोक्ताले खरिद बिल नलिने अर्को समस्या देखिएको छ ।
चाबहिल चोककै छेउमा एउटै पसलमा दुईटा बोर्ड राखेको समेत पाइएको छ । एउटा सटरमा बाहिरबाट हेर्दा सानो किराना पसल जस्तै देखिने तर त्यसका सञ्चालकले छेउका दुईवटा घरमा दुई वटा फ्लाट लिएर सामान भण्डारण गरेको समेत पाइएको छ । भण्डारमा म्याद गुज्रिएका सामान र म्याद भएका सामान एकै ठाउँमा भेटिएका छन् । अनुगमनका क्रममा पसलमा मूल्यसूचि नराखिएको, खानेकुरासँगै झिँगा, मच्छड र साङ्ला मार्ने बिषादी पनि बेच्न राखिएको पाइएको छ ।
यो जस्तै जयबागेश्वरी स्टोरलगायतका स्टोरमा खाद्य सुरक्षाका दृष्टिले भण्डारण असुरक्षित रहेको पाइएको छ । त्यस्तै वडामा दर्ता नगरेको, नापतौल अद्यावधिक नगरेकोलगायतका समस्या पाइएको छ ।
मित्रपार्कमा रहेको जय भोले ट्रेडर्समा पनि ट्याग नभएका दाल र गेडागुडीका प्याकेज गरेको पाइएको छ । अनुगमन समितिले खरिद बिक्री बिल, दर्ता र नविकरण प्रमाण पत्र, गोदाम प्रमाणिकरणको प्रमाण पत्र, व्यवसाय र बहाललगायत करचुक्ता प्रमाण पत्र जस्ता आवश्यक कागजातसहित ३ दिनभित्र महानगरको कृषि बिभागमा सम्पर्क राख्ने गरी निर्देशन दिएको छ ।
