महासंघको केन्द्रीय समितिले निर्णय गर्नुपर्ने विषय पदाधिकारी बैठकले गरेकोमा ढकालको आपत्ति
काठमाडौं । नेपाल उद्योग वाणिज्य महासंघका उपाध्यक्ष चन्द्रप्रसाद ढकालले महासंघ नेतृत्वबिहीन बनेको र विधिविधानको परिपालना हुने छोडेको आरोप लगाएका छन् ।
साउन २६ र २७ को साधारणसभा र निर्वाचन महासंघको पदाधिकारीको बैठकले स्थगित गर्ने निर्णय गरेपछि शुक्रबार पत्रकार सम्मेलन गर्दै ढकालले चर्को असन्तुष्टि व्यक्त गर्दै महासंघमा विधि विधानको पालना हुन छोडेको आरोप लगाएका हुन् । जटिल परिस्थितिमा महासंघलाई सबल, सक्षम र गतिशील नेतृत्वको आवश्यकता रहेको आवाज उठाउँदा पदमा पुग्न हतार गरेको आरोप लगाउने काम भएको उनले बताए ।
ढकालले महासंघको केन्द्रीय समिति बैठकले निर्णय गर्नुपर्ने विषय हतारहतार पदाधिकारी बैठकले गरिएको भन्दै त्यसमा आफ्नो फरक मत रहेको पनि बताए । आफू अहिले पनि उपाध्यक्ष रहेकोले चैतमा निर्वाचन भए पनि आफूले निभाउने भूमिकामा धेरै फरक नपर्ने स्पष्ट पारे ।
यसअघि बिहीबार बसेको महासंघको पदाधिकारी बैठकले कोरोना महामारीको जोखिम देखाउदै साउन २६ र २७ गतेका लागि प्रस्तावित ५४ औँ साधारणसभा स्थगित गर्ने निर्णय गरेको थियो ।
