असार १ गतेदेखि काठमाडौंका सपिङ मल खोल्ने व्यवसायीको निर्णय
काठमाडौं । व्यवसायीहरुले काठमाडौ उपत्यकामा रहेका सपिङ मलहरु खुला गर्ने निर्णय गरेका छन् । शुक्रबार काठमाडौंमा बसेको विभिन्न १२ वटा सपिङ मलका व्यवसायीहरुको संगठनको बैठकले असार एक गतेदेखि खुला गर्ने एकतर्फी निर्णय गरेको हो । सरकारले लकडाउन खुकुलो बनाउदै सम्पूर्ण पसलहरु खुला राख्ने भने पनि सपिङ मलहरु भने तत्काल नखुलाउने बताएको थियो ।
व्यवसायीहरुले सरकारी निर्णय उचित नभएको भन्दै मलहरु खुला गराउने एकतर्फी निर्णय गरेका हुन् । उनीहरुले निर्णयको बोधार्थ तीनै जिल्ला प्रशासन कार्यालय, नेपाल उद्योग वाणिज्य महासंघलगायतलाई दिएका छन् । उनीहरुले सबै स्वास्थ्य सुरक्षात्मक उपाय अपनाएर खुला गर्ने निर्णय गरेको बताएका छन् ।
