तीन वटै तहका सरकारबीच समन्वय नहुँदा कृषिका योजना प्रभावितः कृषिमन्त्री
काठमाडौं । कृषि तथा पशुपन्छी विकास मन्त्री घनश्याम भुसालले तीन वटै तहका सरकारबीच समन्वय हुन नसक्दा कृषिका योजनाहरु प्रभावित भएको बताएका छन् ।
मन्त्रालयमा आइतबार पत्रकारहरुसँग कुरा गर्दै मन्त्री भुसालले स्थानीय सरकार, प्रदेश सरकार र संघीय सरकारबीच समन्वय नहुँदा कृषिका योजनाहरु कार्यान्वयन गर्न नसकिएको बताएका हुन् ।
त्यसका लागि प्रदेश सरकारका कृषि मन्त्रीहरुसँग मन्त्रालयमा छलफल गरिरहेको समेत उनले बताए । उनले तीन वटै तहका सरकारबीच समन्वय स्थापित गर्न संयन्त्र बनाई काम गर्ने सम्भावना रहेको समेत बताए ।
यस्तै मन्त्री भुसालले आफू मन्त्रालयमा आएदेखि प्रशासनको कामलाई व्यवस्थित बनाउने, सेवालाई प्रभावकारी बनाउने तथा सुशासन स्थापित गरी कृषिका नयाँ नीतिहरुलाई अगाडी सार्ने विषयमा ध्यान दिएको बताए ।
