बलात्कारको अभियोग लागेका सिद्धबाबाद्वारा अदालतमा आत्मसमर्पण

विराटनगर । अनुयायीमाथि बलात्कारको अभियोग मुद्दामा फरार रहेका ‘सिद्ध बाबा भनिने भनिने कृष्णबहादुर गिरी अदालतमा उपस्थित भएका छन् । सोमवार उनले जिल्ला अदालतमा आत्मसमर्पण गरेका हुन् । उनलाई अब कारागार चलान गरिनेछ । माघ ९ गते उच्च अदालत विराटनगरका न्यायाधीश तिलप्रसाद श्रेष्ठ र प्रेमराज कार्कीको इजलासले गिरीलाई जेल चलानको लागि आदेश दिएको थियो ।

तर उच्च अदालत विराटनगरमा जबर्जस्ती करणीअन्तर्गत थुनछेकको सुनवाइ चलिरहेका बेला उनी आफ्ना सुरक्षागार्डलाई नेपालमै छाडेर भारत छिरेका थिए । जबर्जस्ती करणीको जाहेरी परेपछि उनी मंसिर १२ गते विराट नर्सिङ होममा भर्ना भएका थिए । त्यहाँ उनी ३८ दिन बसे । सुनसरी जिल्ला अदालतले मंसीरमा उनलाई ३ लाख धरौटीमा रिहा गर्न आदेश दिएको थियो।