माधव नेपाल पक्षीय विद्यार्थी संगठनद्वारा मोदीको पुत्ला दहन

काठमाडौं । दार्चुला घटनाको विरोधमा नेकपा (एकीकृत समाजवादी)सम्वद्ध विद्यार्थीहरुले भारतीय प्रधानमन्त्री नरेन्द्र मोदीको पुत्ला जलाएका छन् । अनेरास्ववियुका अध्यक्ष सुरेश पराजुलीको नेतृत्वमा विद्यार्थीहरुले रत्नराज्यलक्ष्मी क्याम्पस परिसरमा मोदीको पुत्ला जलाएका हुन् । विद्यार्थीहरुले शुक्रबार रत्न राज्य क्याम्पस, प्रदर्शनीमार्गमा प्रदर्शन गर्दै मोदीको पुत्ला जनाएका हुन् ।

उनीहरुले जयसिंह धामीलाई न्याय दे, सीमा अतिक्रमण बन्द गर्, भारतीय विस्तारवाद मुर्दावाद जस्ता नारा लगाएका थिए । १५ साउनमा भारतीय सीमा सुरक्षा बल –एसएसबी)ले तुनइको तार काटिदिँदा दार्चुलाको ब्याँस गाउँपालिका– २ का जयसिंह धामी महाकाली नदीमा खसेका थिए ।

घटनाबारे छानविन गर्न बनाएको समितिले हालै बुझाएको प्रतिवेदनमा पनि एसएसबीको उपस्थितिमा घटना भएको उल्लेख छ । तर घटनाको विरोध गर्दै भारतलाई कूटनीतिक नोट पठाउने काम समेत नगरेको भन्दै सरकारको पनि आलोचना भइरहेको छ ।