अदालतको निर्णय आएपछि पार्टीको विवाद मिलाउन देउवा सक्रिय हुने

काठमाडौं । नेपाली कांग्रेसका नेता नैनसिंह महरले लामो समय विदेशमा उपचारपछि स्वदेश फर्किएका पार्टीका पूर्वसभापति शेरबहादुर देउवासँग भेट गरेका छन् । आइतबार उनीहरुबीच भेटवार्ता भएको हो ।

भेटमा महरले देउवाको स्वास्थ्य अवस्थाबारे जानकारी लिएका थिए । देउवाको स्वास्थ्य राम्रो रहेको थाहा पाएपछि आफू खुसी भएको उनले बताएका छन् ।

महरले पार्टीभित्रको द्वन्द्व अन्त्य गरी एकताबद्ध कांग्रेस निर्माणमा देउवाको भूमिका महत्वपूर्ण हुने बताएका छन् । उनले पार्टी एकताका लागि सभापति गगनकुमार थापालगायत सबै नेतासँग आफूहरूले संवाद गरिरहेको जानकारीसमेत देउवालाई गराएका थिए ।

त्यस क्रममा महरले देउवा र सभापति थापाबीच भेटघाट तथा संवाद आवश्यक रहेकोमा जोड दिएका थिए ।
जवाफमा देउवाले आफूले पार्टीभित्रको विवाद समाधानका लागि पहल गरिरहेको बताएका थिए । अदालतको निर्णय आएपछि थप प्रक्रिया अघि बढाउने धारणा देउवाले राखेको महरले जानकारी दिएका छन्।