बीबीसी । राष्ट्रपति डोनाल्ड ट्रम्पले बालबालिकालाई दिइने खोपको संख्या घटाउन र मम्प्स, दादुरा तथा रुबेलाविरुद्धको खोप छुट्टाछुट्टै लगाउन सिफारिस गर्ने आदेशमा हस्ताक्षर गरेका छन् ।
राष्ट्रपतिले लामो समयदेखि एमएमआर खोपको सुरक्षामाथि प्रश्न उठाउँदै आएका छन् । तर, धेरै अध्ययनहरूले एमएमआर खोप र अटिजमबीच कुनै सम्बन्ध नरहेको पत्ता लगाएका छन् ।
यस आदेशले अमेरिकन एकेडेमी अफ पेडियाट्रिक्सले हाल सिफारिस गरेका १८ वटा बालबालिकाका खोपको संख्या घटाएर ११ वटा बनाउन पनि सिफारिस गरेको छ।
ओभल अफिसमा बोल्दै ट्रम्पले आफ्नो प्रशासनले ‘सबैभन्दा गम्भीर र खतरनाक रोगहरूविरुद्ध केवल ११ वटा मुख्य खोपका लागि स्वर्ण–मानक बाल खोप सिफारिसहरूलाई मान्यता दिइरहेको” बताए।
यस आदेशअन्तर्गत सबै बालबालिकाका लागि सिफारिस गरिएका खोपहरूमा दादुरा, मम्प्स, रुबेला, डिफ्थेरिया, टिटानस, कालीखोकी, पोलियो, हेमोफिलस इन्फ्लुएन्जा टाइप बी, न्युमोकोकल रोग, ह्युमन प्यापिलोमाभाइरस र भेरिसेला अर्थात् चिकेनपक्सविरुद्धका खोप छन्।
‘हामी यी खोपहरू घटाउँदैछौँ,’ ट्रम्पले भने। ‘केवल खोप वा ‘जाब’ कम लगाउने कुरा मात्र होइन, डाक्टरकहाँ जाने विभिन्न भेटघाटमा तिनलाई क्रमशः लगाउने कुरा पनि हो।’
ट्रम्पले एमएमआर खोप एकैपटक दिँदा निकै घातक हुन सक्ने संकेत गरे। उनले यसलाई बच्चाको शरीरमा सोडाको बोतल खन्याएजस्तै भएको तुलना गरे।
तर विज्ञहरूका अनुसार खोपहरूबीच समय अन्तर राख्दा त्यस अवधिमा बालबालिकालाई रोग लाग्ने सम्भावना बढ्न सक्छ। साथै, धेरैपटक स्वास्थ्यकर्मीलाई भेट्नुपर्ने भएकाले उनीहरूले खोप लगाउने अपोइन्टमेन्ट छुटाउने सम्भावना पनि बढ्न सक्छ।
रोग नियन्त्रण तथा रोकथाम केन्द्रका अनुसार, संयुक्त एमएमआर खोपलाई तीनवटा छुट्टाछुट्टै खोपमा विभाजन गर्दा कुनै फाइदा हुने देखाउने ‘प्रकाशित वैज्ञानिक प्रमाण छैन।’
प्रतिक्रिया