बग्दाद । इराकमा अहिलेसम्म अमेरिकी सेनाले गत महिना सिरियाबाट स्थानान्तरण गर्न थालेका इस्लामिक स्टेट (आइएस) समूहका दुई हजार २२५ बन्दीहरू आइपुगेका इराकी अधिकारीले बताएका छन्।
अमेरिकी केन्द्रीय कमान्ड (सेन्टकम) ले गत महिना सिरियामा रहेका सात हजार आइएस बन्दीमध्ये दुई हजार २२५ जनालाई सिरियाबाट इराक स्थानान्तरण गरिएको छ ।
यसअघि उनीहरुलाई उत्तरपूर्वी सिरियामा कुर्द नेतृत्वको ‘सिरियन डेमोक्रेटिक फोर्सेज (एसडीएफ)’ ले सञ्चालन गरेको जेल र शिविरमा राखिएको थियो ।
सिरियाका लागि अमेरिकी विशेष प्रतिनिधि टम ब्यारेकले आईएससँग जुध्न एसडीएफको भूमिका समाप्त भएको घोषणा गरेपछि यो स्थानान्तरण योजनाको घोषणा गत महिना गरिएको थियो।
इराकी प्रधानमन्त्रीको कार्यालयसँग जोडिएको सुरक्षा सूचना शाखाका प्रमुख साद मानले भने, “इराकले सिरियाली पक्षबाट दुई हजार २२५ आतङ्ककारीहरूलाई अन्तर्राष्ट्रिय गठबन्धनको समन्वयमा पुर्याएको छ ।’
उनीहरूलाई नियमित रुपमा कडा नजरबन्द केन्द्रमा राखिएको उनले बताए । कुर्दिस सेनाको स्रोतले एएफपीलाई बताएअनुसार ’अन्तर्राष्ट्रिय गठबन्धनको संरक्षणमा आइएसका बन्दीहरुलाई सिरियाबाट इराकमा स्थानान्तरण गरिरहेको’ पुष्टि गरिएको छ ।
शनिबार उत्तरपूर्वी सिरियाको कुर्द बहुल शहर कामिश्ली नजिकै एएफपीका एक फोटोग्राफरले अमेरिकी सेनाको काफिला र रंगीन झ्यालहरू भएका ११ वटा बसहरू देखेको पुष्टि गरे ।
सन् २०१४ देखि अन्तर्राष्ट्रिय गठबन्धनको समर्थनमा इराकी सेनाले सन् २०१७ मा इराकलाई पराजित गर्न सफल नहुँदासम्म आइएसले उत्तरी र पश्चिमी इराकको भूभाग कब्जा गरेको थियो।
इराक अझै पनि जिहादीहरूले गरेको गम्भीर दुव्र्यवहारबाट मुक्त हुने क्रममा छ । हालैका वर्षहरूमा इराकी अदालतले आतङ्कवादको अपराधमा दोषी ठहर भएकाहरूलाई मृत्युदण्ड र आजीवन कारावासको सजाय सुनाएको छ ।
यस समूहको सदस्यता लिएको आरोपमा दोषी ठहरिएका हजारौँ इराकी र विदेशी नागरिकहरू इराकी जेलमा छन्।
सोमबार इराकी न्यायपालिकाले उसले अमेरिकी सेनाको कारबाहीमा नियन्त्रणमा लिइएका एक हजार ३८७ बन्दीहरूको अनुसन्धान प्रक्रिया सुरु गरेको छ ।
इराकी सुरक्षा स्रोतहरूका अनुसार इराकमा स्थानान्तरण गरिएका बन्दीहरूमा सिरियाली, इराकी, युरोपेली र अन्य नागरिकता भएका व्यक्तिहरू पनि छन्।
इराकले सम्बन्धित देशहरूलाई आफ्ना नागरिकहरू फिर्ता गर्न र उनीहरूको अभियोजनको सुनिश्चित गर्न आह्वान गरिरहेको छ।
प्रतिक्रिया