प्रहरीले जुम्लाबाट स्याउ ल्याउने किसानसँग सय रुपैयाँसम्म घुस मागेको सांसद शाहीको आरोप

काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानेन्द्र शाहीले जुम्लादेखि आउने बाटो चार दिनदेखि बन्द हुँदा पनि सरकारको ध्यान नगएको बताएका छन् ।

बुधबारको प्रतिनिधिसभा बैठकमा शाहीले चार दिनदेखि बन्द जुम्लादेखि आउने बाटोमा सडक डिभिजन कार्यालय जुम्लाको एउटा डोजरले लगेर काम गरेको भन्दै सडक डिभिजन कार्यालय सुर्खेत र जुम्लालाई सडक खुलाउने उपकरण राख्न संसदबाट आग्रह गरे ।

उनले भने, ‘जुम्लादेखि आउने बाटो चार दिनदेखि बन्द छ । सडक डिभिजन कार्यालय जुम्लाको एउटा डोजरले कोदोमा कुटो हाने जसरी त्यो सडक हानेको छ । त्यो सडक खोल्न गाह्रो भएको छ, बल्ल बल्ल खोलिएको थियो फेरि राति पहिरो आयो, त्यसकारण एउटा मात्र बाटो खुलाउने उपकरण होईन कि सडक डिभिजन कार्यालय सुर्खेत, जुम्लालाई त्यहाँ अहिले यो स्याउ आउने सिजनमा सडक खुलाउने उपकरण राख्न संसदबाट अपील गर्न चहान्छु ।’

यस्तै, उनले प्रहरीले स्याउ ल्याउने किसानसँग सय रुपैयाँसम्म घुस मागेको भन्दै स्याउ ल्याएको गाडीलाई कतै पनि जाँच नगर्न पनि आग्रह गरे ।

उनले भने, ‘सभामुखमार्फत गुहमन्त्रीलाई भन्न चहान्छु जुम्लाबाट स्याउ ल्याएको हो अफिम होइन ठाउँठाउँमा प्रहरीले जाँच गरेर सय रुपैयाँसम्म घुस मागेको छ किसानसँग त्यसकारण म यहीबाट भन्न चहान्छु स्याउ ल्याएको हो र स्याउ ल्याएको गाडी कतै पनि चेक नगरियोस् ।’ साथै, भिटिज भिसा प्रकरणमा निरन्तर आन्दोलनरत रहेको भन्दै आज पनि बैठक बहिष्कार गर्ने उनले बताए ।