जसपा विभाजनसम्बन्धी रिटको अब सर्वोच्चको पूर्ण इजलासमा सुनुवाइ हुने

काठमाडौं । जनता समाजवादी पार्टी नेपालको विभाजनसम्बन्धी विवाद सर्वोच्च अदालतले पूर्ण इजलासमा पठाउन आदेश दिएको छ ।

आइतबार सर्वोच्चका न्यायाधीश हरि फुयाल र तिलप्राद श्रेष्ठको इजलासले मुद्दालाई पूर्ण इजलासमा पठाउन आदेश दिएको हो । वैशाख २३ गते जसपा नेपालका सात जना सांसद सहितका नेताहरुले नयाँ दल दर्ताका लागि निर्वाचन आयोगमा निवेदन दिएका थिए ।

आयोगले २४ वैशाखमा नै अशोक राई नेतृत्वमा जनता समाजवादी पार्टी नाममा नयाँ दल दर्ता गरेको थियो । त्यसविरुद्ध जसपा नेपालका अध्यक्ष उपेन्द्र यादव अदालत गएका हुन् । उनले निर्वाचन आयोगको निर्णय संविधान विपरित रहेको भन्दै खारेज गर्न माग गरेका छन् ।

यसअघि सो रिटमा गत वैशाख २७ गते सर्वोच्चका न्यायाधीश विनोद शर्माको एकल इजलासले दल विभाजनपछि हालसम्म भएका काम कारबाहीहरू यथास्थितिमा राख्न आदेश दिँदै जेठ ८ गते गते छलफलका लागि दुवै पक्षलाई बोलाएको थियो ।