कांग्रेसले जे सोचेर संसदीय समितिको माग गरेको थियो, पूरा भयो, गृहमन्त्रीले समितिलाई छल्ने ठाउँ छैनः महामन्त्री थापा(भिडियोसहित)

काठमाडौं । नेपाली कांग्रेसका महामन्त्री गगन थापाले सहकारी ठगीको छानबिन गर्न गठित संसदीय समितिको कार्यादेशमा उपप्रधान तथा गृहमन्त्री रवि लामिछानेको नाम नराखेपनि छानबिनमा तानिने बताएका छन् ।

बिहीबार सामाजिक संजालमार्फत भिडियो सन्देश जारी गर्दै महामन्त्री थापाले अब गृहमन्त्री अनुसन्धानको दायराबाट भाग्न सक्ने ठाउँ नभएको बताएका हुन् । उनले प्रधानमन्त्रीले सहकारी ठगीमा गृहमन्त्रीको संलग्नता छैन भनेर जिम्मा लिएपछि आफूहरुले समिति गठनको माग गरेको र माग पूरा भएको बताए ।

उनले सत्तापक्ष समिति नै बनाउन नदिने खेलमा लागेपछि आफूहरु गृहमन्त्रीको नाम नराखेरै समिति बनाउन तयार रहेको बताए । उनले एमालेले सदन बन्द गरेर संसदीय समिति गठन नगर्नेतिर लागेको थाहा पाएपछि आफूहरुले गृहमन्त्रीको नाम नराखे पनि समिति बनाउन लचक भएको बताए ।

उनले भने, ‘फरक पार्टीको नेताले पनि के भन्ने अवस्था आयो भने रवि लामिछाने नामै तोकेर समिति बनाउँ भनेर कांग्रेसले भनिराखेको छ। संसद अरु केही दिन यसरी पेलेर चलाउने। सभामुखले पनि साथ दिनुभएकै छ। त्यसपछि संसद बन्द गर्दिने। संसद बन्द गरिसकेपछि अब ६ महिना पछि मात्रै, करिब करिब एक्कैचोटी ६ महिनापछि संसद बोलाए भैहाल्यो। र, संसदीय समिति नबनाउने।’

उनले अब यसमा संलग्न भएका प्रत्येक मानिसको हिसाबकिताब समितिले माग्ने र सत्यतथ्य बाहिर आउने बताए । महामन्त्री थापाले अब संसदीय छानबिन समितिलाई निर्बाध रूपमा काम गर्न दिनुपर्ने बताए । उनले कांग्रेसले जे सोचेर समितिको माग गरेको थियो, त्यसै अनुसार गठन भएको र काम गर्ने बताए ।

उनले भने, ‘छानबिन समितिमा रहेका सांसदहरूले कार्यादेश के हो भन्ने राम्रोसँग बुझ्नुभएको छ । गोरखा मिडिया नेटवर्कमा संलग्न गृहमन्त्रीलाई पनि बयानमा बोलाउने हो भनेर कार्यादेश बनाउने बेला नै प्रधानमन्त्रीसँग छलफल भएको थियो । भोलिका दिनमा भाषामा गएर कपटपूर्ण ढंगले व्याख्या गर्न पाउँदैन भनेर प्रधानमन्त्रीले भनेका कुरा सुन्ने साथीहरू नै समितिमा हुनुहुन्छ ।’