काठमाडौं । प्रधानमन्त्री पुष्पकमल दाहाल प्रचण्ड र नेकपा एकीकृत समाजवादीका सम्मानित नेता झलनाथ खनालबीच भेटवार्ता भएको छ । प्रधानमन्त्री प्रचण्डलाई भेट्न पूर्वप्रधानमन्त्री खनाल बिहीबार बिहान प्रधानमन्त्री निवास बालुवाटार पुगेका थिए । भेटमा समसामयिक राजनीतिक अवस्थाबारे छलफल भएको नेता खनालको सचिवालयले जनाएको छ ।
भेटमा सरकारलाई सुदृढ बनाउने विषयमा पनि छलफल भएको बताइएको छ । एकीकृत समाजवादीका अध्यक्ष माधवकुमार नेपाल बुधबार कांग्रेस सभापति शेरबहादुर देउवा निवासमा भएको विपक्षी दलको बैठकमा सहभागी भएपछि प्रचण्ड र खनालबीच भेटवार्ता भएको हो । बुधबार विपक्षी दलको बैठकमा सहभागी भएका अध्यक्ष नेपालले मधेस सरकार जोगाउन एकमत हुने विषयमा छलफल भएको थियो ।
बुधबार देउवा निवास बूढानीलकण्ठमा सभापति देउवा, अध्यक्ष नेपाल, जसपा नेपालका अध्यक्ष उपेन्द्र यादव र लोसपा अध्यक्ष महन्थ ठाकुरबीच भेटवार्ता भएको थियो । सरकारमा सहभागी एकीकृत समाजवादी विपक्षी दलको बैठकमा सहभागी भएपछि प्रधानमन्त्री सशंकित भएका छन् । एकीकृत समाजवादीभित्र सरकार छाड्नुपर्ने मत बलियो भएको बताइएको छ ।
प्रधानमन्त्री प्रचण्ड र एमाले अध्यक्ष ओलीले सरकार संचालनमा एकलौटी निर्णय गरी आफूहरुलाई वेवास्ता गरेको भन्दै एकीकृत समाजवादीका नेताहरु असन्तुष्ट देखिएका छन् ।
प्रतिक्रिया