लम्पी स्किन नियन्त्रणका लागि पशु स्वास्थ्यकर्मी परिचालन गर्न सांसद गिरीको माग

काठमाडौं । नेकपा एमाले सांसद पदम गिरीले लम्पी स्किन रोग रोकथाम तथा नियन्त्रणका लागि सरकार उदासिन देखिएको आरोप लगाएका छन् । शुक्रबारको प्रतिनिधिसभा बैठकमा सांसद गिरीले रोग नियन्त्रणका लागि पशु स्वास्थ्यकर्मी परिचालन गर्न माग गरेका हुन् ।

सांसद गिरीले लम्पी स्किनबाट किसानले पालेका पशुचौपाय धमाधम मर्न थालेको भन्दै यथासिघ्र पशु स्वास्थ्यकर्मी परिचालन गर्न सरकारसँग माग गरे ।

उनले भने, ‘किसानहरू आहालमा डुबेर बसिरहेका छन्। पीडाले रोइरहेका छन्। यस्तो संवेदनशील विषयमा सरकार उदासिन देखियो।’

उनले ४ महिनाको अवधिमा ८ लाख पशुचौपायहरू संक्रमित भएका र २७ हजार चौपायहरू मरिसक्दा पनि सरकारले रोकथामको पहल नगरेको बताए। सरकारको उदासिनताका कारण किसानले यति ठूलो क्षति व्यहोर्नु परेको उनको भनाइ छ।