विश्वमा कोरोना संक्रमणबाट एकैदिन १० हजार ८ सयभन्दा बढीको मृत्यु
विश्वभर महामारीको रुपमा फैलिएको कोरोना भाइरसको संक्रमणबाट मृत्यु हुनेको संख्या १३ लाख ५४ हजार नाघेको छ ।
पछिल्लो २४ घण्टामा थप १० हजार ८ सयभन्दा बढीको मृत्यु भएको छ । एकैदिन मृत्यु भएका संक्रमितको यो संख्या अहिलेसम्मकै उच्च हो । यसअघि बुधबार १० हजार ५३६ जनाको मृत्यु भएको थियो । हालसम्म कोरोनाका कारण मृत्यु हुनेको संख्या १३ लाख ५४ हजार ६१६ पुगेको छ । दोस्रो लहरको संक्रमण उच्च भएको युरोपमा मात्रै पछिल्लो २४ घण्टामा ५ हजार १४८ जनाको मृत्यु भएको छ । जाडो मौसम सुरुभएसंगै संक्रमितको संख्या बढ्दै गएकाले बेलायतलगायत युरोपभरि नै मृतकको संख्या पनि बढ्दै गएको छ ।
यस्तै पछिल्लो २४ घण्टामा विश्वभर ६ लाख ५ हजार भन्दा बढी संक्रमित थपिएका छन् । योसँगै विश्वभर संक्रमितको संख्या ५ करोड ६५ लाख ५८ हजार २२२ पुगेको छ । संक्रमितमध्ये ३ करोड ९३ लाख ४९ हजार ८०८ जना संक्रमण मुक्त भएका छन् ।
संक्रमितमध्ये एक करोड ५८ लाख ५३ हजार ७ सय बढी उपचाररत छन् भने १ लाख भन्दा बढीको अवस्था गम्भीर रहेको छ ।
यस्तै, अमेरिकामा संक्रमितको संख्या १ करोड १८ लाख ७३ हजार ७२७ पुगेको छ । कोरोनाका कारण मृत्यु हुनेको संख्या २ लाख ५६ हजार २५४ पुगेको छ भने अहिलेसम्म ७१ लाख ६६ हजार ९९६ जना संक्रमणमुक्त भएका छन् ।
त्यसैगरी, भारतमा हालसम्म ८९ लाख ५८ हजार भन्दा बढी मानिस कोरोनाबाट संक्रमित भएका छन् । संक्रमितमध्ये एक लाख ३१ हजार ६ सय बढीको मृत्यु भइसकेको छ भने हालसम्म ८३ लाख ८१ हजार बढी निको भइसकेका छन् ।
ब्राजिलमा कोरोना भाइरसबाट सङ्क्रमित हुनेको संख्या ५९ लाख ४७ हजार नाघेको छ भने १ लाख ६७ हजार ४९७ जनाको मृत्यु भएको छ । संक्रमितमध्ये ५३ लाख ८९ हजार भन्दा बढी निको भएका छन् ।
