स्पेनी प्रधानमन्त्री पेड्रो सान्चेजद्वारा राष्ट्रिय एकताका लागि आह्वान
स्पेनी प्रधानमन्त्री पेड्रो सान्चेजले राष्ट्रिय एकताका लागि सबै स्पेनी नागरिकसँग आह्वान गरेका छन् । यो संकटको घडीमा सबै देशबासीहरुले पनि सहयोग गर्नुपर्ने भन्दै उनले नत्र महामारीका विरुद्धमा लड्नका लागि सरकारलाई मात्र गाह्रो पर्ने बताए ।
स्पेनमा कोभिड १९ को संक्रमण पहिलेको भन्दा पनि अझ खतरनाक रुपमा बढ्दै गएपछि त्यसको नियन्त्रणका लागि सरकारले लकडाउनदेखि लिएर विभिन्न कडा प्रतिबन्धहरु लगाएको छ । तर नागरिकले भने त्यसको विरोध गरेका छन् । यहाँका नागरिकले स्पेनको सरकारले लगाएको प्रतिबन्धका विरुद्धमा विभिन्न स्थानमा प्रदर्शन नै गरिरहेका छन् ।
सरकारले लामो समयका लागि र दशेव्यापी रुपमा नै निकै कडा खालको प्रतिबन्धहरु लगाए पछि यसका विरुद्धमा नागरिकहरु प्रदर्शनमा उत्रिएका छन् । त्यसैले प्रधानमन्त्री पेड्रो सान्चेजले राष्ट्रिय एकताका लागि सबै स्पेनी नागरिकसँग आह्वान गरेका हुन् । उनले सबैलाई जिम्मेवारी पूरा गर्न र आफूलाई एक नागरिकको कर्तव्य पुरा गर्न आह्वान गरेका छन् ।
महामारी नियन्त्रणका लागि हालका लागि लकडाउन भन्दा अर्काे कुनै विकल्प नरहेकोले सरकारले यसो गर्नु परेको हो भन्दै उनले यसका लागि सबै नागरिकको सहयोग नहुने हो भने अप्ठेरो पर्ने बताए ।
कतिपय नागरिकले सरकारको अहिलेको प्रतिबन्धका विरुद्धमा हिंसात्मक रुपमा पनि प्रदर्शन गरेको प्रसंग उल्लेख गर्दै प्रधानमन्त्री पेड्रो सान्चेजले नागरिकको यो गैरजिम्मेवारी कामले महामारी नियन्त्रणका लागि समस्या पर्ने उल्लेख गरे ।
