कानपुर क्षेत्रका कुख्यात अपराधी विकास दुबे पक्राउ

भारतको कानपुर क्षेत्रका कुख्यात अपराधी विकास दुबे बिहीबार पक्राउ परेका छन् । गतसाता उनलाई पक्राउ गर्न गएका आठ प्रहरीको हत्या भएको थियो । दुबेलाई मध्यप्रदेशबाट पक्राउ गरिएको भारतीय संचारमाध्यमले जनाएका छन् । तर दुबेले सञ्चारमाध्यम र प्रहरीलाई बोलाएर आत्मसमर्पण गरेको बताइएको छ ।

कतिपय संचारमाध्यमलाई दुबेले आफूले आत्मसमर्पण गर्न लागेकोबारे खबर गरेका थिए । सञ्चार माध्यमहरुका प्रतिनिधिहरु महाकाल थाना नजिकैको महाकाल मन्दिर अगाडि पुगेपछि उनी ’म कानपुरवाला विकास दुबे हुँ’ भन्दै चिच्याएका थिए । यसको केहीबेरमा आएको प्रहरीले उनलाई पक्राउ गरेर लगेको थियो ।

उत्तर प्रदेश प्रहरीले दुबे पक्राउको पुष्टि गरेको छ । गतासाता कानपुरमा उनलाई पक्राउ गर्न गएको प्रहरीमाथि उनको समूहले गोली चलाउँदा आठ प्रहरीको मृत्यु भएको थियो भने ६ जना घाइते भएका थिए । घटनापछि उत्तर प्रदेशसहित तीन राज्यका प्रहरीले उनको खोजी गरिरहेको थियो । दुबेविरुद्ध हत्या लुटपाटलगायतका ६० भन्दा बढी उजुरी दर्ता छन् ।