कोरोना भाइरसको जोखिमका कारण एभरेस्ट प्रिमियर लिग (इपिएल) स्थगित
काठमाडौं । एभरेस्ट प्रिमियर लिग (इपिएल) स्थगित भएको छ । कोरोना भाइरसको संक्रमणको जोखिमलाई मध्यनजर गर्दै सरकारले सभा समारोह लगायतका कार्यक्रम नगर्न आग्रह गरेपछि इपिएल स्थगित गरिएको हो ।
इपिएल आयोजना गर्दा धेरै संख्यामा दर्शकहरु उपस्थित हुने र भाइरसको संक्रमण फैलिन सक्ने विषयलाई बुझ्दै सरकार र सरोकारवालासँग छलफल गरेर यसपटकको इपिएल स्थगित गरिएको इपिएलका कार्यकारी निर्देशक अमिर अख्तरले जानकारी दिएका छन् ।
इपिएल यही मार्च १४ देखि २८ सम्म काठमाडौंमा आयोजना हुने तय भएको थियो। यसपटकको इपिएलमा क्रिस गेलदेखि विश्वका चर्चित क्रिकेट खेलाडीहरु काठमाडौं आउने तय भएको थियो ।
