ताप्लेजुङमा घुससहित दुई जना सहायक वन अधिकृत पक्राउ

ताप्लेजुङ । डिभिजन वन कार्यालय ताप्लेजुङका दुई जना सहायक वन अधिकृत घुससहित पक्राउ परेका छन् । अख्तियार दूरुपयोग अनुसन्धान आयोगको टोलीले सहायक वन अधिकृतद्वय वीरेन्द्र साह र जीवनकुमार यादवलाई जनही एक/एक लाख रुपैयाँ घूससहित पक्राउ गरेको हो ।

उनीहरुले सेतक चिनी छोडपूर्जीको लागि सेवाग्राहीसँग घुस लिएका थिए । दुवैजनालाई कार्यालयमै रकम लेनदेन भइरहेको बेला पक्राउ गरेको आयोगको कार्यालय इटहरीका प्रमुख चक्रबहादुर बुढाले जानकारी दिएका छन् । चार सय किलो सेतक चिनी बिक्रीको लागि छुटपुर्जी बनाइदिन व्यवसायी सविन बानियाँसग साह र यादवले घुस लिएका हुन् ।