वीपी कोइराला सानो देशको अग्लो ब्यक्तित्वः देउवा
काठमाडौं । नेपाली कांग्रेसका सभापति शेरबहादुर देउवाले वीपी कोइराला सानो देशको अग्लो ब्यक्तित्व भएको दूरदर्शी राजनेता भएको बताएका छन् । वीपीको ३८ औं स्मृति दिवसमा कांग्रेसको प्रचार विभागले मंगलबार गरेको कार्यक्रममा सभापति देउवाले वीपी राष्ट्रवादी, समाजवादी र प्रजातन्त्रवादी रहेको बताएका हुन् ।
प्रजातान्त्रिक समाजवादको उहाँको विचार आज झनै सान्दर्भिक भएको भन्दै सभापति देउवाले नेपालले आज हिंड्ने मुल बाटो वीपिकै विचार र विश्वासको बाटो भएको बताए । उनले बाटो ईमान्दार ढंगले पछ्याएर मात्रै हामी सबैको सम्मान र समृद्धिको लक्ष्य हासिल गर्न सकिने बताए ।
उनले भने, ‘राष्ट्र माथि संकट आउँदा आफ्नो जिवनको रिस्क लिएर ०३३ सालमा वीपी स्वदेश फर्कनु भएको थियो । आज राष्ट्रियताको प्रश्नमा मुलुकमा विशेष छलफल भई रहेका बेला वीपिको विचार र विश्लेषणकै माध्यमबाट हामीले राष्ट्रभित्र राष्ट्रिय एकता र मेलमिलापको भावना साथ समाधान पहिल्याउनु पर्दछ ।’
