एमाले सांसदको प्रश्नः जनताको प्रतिनिधिले बिदा गरेको श्री ५ फर्किन्छ भने सम्झौताका आधारमा विदा गरेको श्री ३ किन फर्किँदैन ?
काठमाडौं । नेकपा एमालेले राष्ट्रिय प्रजातन्त्र पार्टीले राजा फर्काउन भए पशुपतिशम्सेर राणालाई श्री ३ बनाएर फर्काउन प्रस्ताव गरेको छ ।
आइतबारको प्रतिनिधिसभा बैठकमा नेकपा एमालेका सांसद ईश्वरबहादुर रिजालले यस्तो प्रस्ताव राखेका हुन् । उनले पूर्वराजालाई फर्काउने भए पशुपतिशम्सेर पनि न्याय दिनुपर्ने बताए ।
उनले भने, ’ज्ञानेन्द्रको नाती हृदयन्द्रलाई श्री ५ बनाएर फर्काउने भए मोहनशमशेरको नाती पशुपतिशमशेर जंगबहादुर राणालाई श्री ३ फर्काउँ । राप्रपाले उहाँलाई पनि न्याय गर्नुपर्यो ।’
उनले अहिले आएर जनताको प्रतिनिधिले बिदा गरेको श्री ५ फर्किन्छ भने सम्झौताका आधारमा विदा गरेको श्री ३ किन फर्किँदैन? भन्ने प्रश्न गरे ।
उनले त्रिभुवन, नेहरु र मोहनशमशेरको बीचमा सम्झौताबाट नेपालबाट श्री ३ बिदा भएको र २०६५ साल जेठ १५ गते जनताको निर्विचत संविधान सभामार्फत नेपालबाट श्री ५ समाप्त भएको बताए ।
