प्रचण्डले देउवासँग छलफल गरी मन्त्रीको नाम टुंगो लगाउने
काठमाडौँ । नेकपा माओवादी केन्द्रले कांग्रेस सभापति शेरबहादुर देउवासँग छलफल गरेर मन्त्रीको टुंगो लगाउने भएको छ । मंगलबार बिहान पेरिसडाँडास्थित केन्द्रीय कार्यालयमा बसेको स्थायी कमिटी बैठकमा नयाँ सरकारमा कसलाई पठाउने भन्नेबारे छलफल भएको थियो ।
नेता नारायणकाजी श्रेष्ठले अध्यक्ष पुष्पकमल दाहाल प्रचण्डले देउवासँग छलफल गरेर मात्रै मन्त्रीको टुंगो लगाउने बैठकमा कुरा भएको जानकारी दिए । उनले सर्वोच्च अदालतबाट आएको फैसला कार्यान्वयन गर्न सबै राजनीतिक पार्टी र शक्तिलाई राष्ट्रिय सहमतिमा लगेर एकताबद्ध गर्ने बताए ।
अध्यक्ष प्रचण्डले देउवासँग सरकार सञ्चालनको निम्ति आवश्यक विविध विषयहरुमा प्रारम्भिक छलफल गर्ने र सरकारको स्वरुपबारे ठोस छलफल गरेर आजको मन्त्रिपरिषद् गठनको प्रक्रियालाई पहल गर्ने श्रेष्ठले बताए । माओवादी केन्द्रका अध्यक्ष दाहाल स्थायी कमिटीको बैठक सकेर देउवासँग छलफल बूढानीलकण्ठ पुगेका छन् ।
