संसदले सत्ता चलाउन अयोग्य भनिसकेपछि ओलीलाई फेरि नियुक्ति गलतः वरिष्ठ अधिवक्ता वैद्य
काठमाडौं । वरिष्ठ अधिवक्ता राघवलाल वैद्यले प्रतिनिधिसभामा विश्वास गुमाइसकेका व्यक्तिलाई अर्को उपधाराअनुसार प्रधानमन्त्रीमा नियुक्ति गरेर राष्ट्रपतिले गल्ती गरेको बताएका छन् ।
सोमबार संवैधानिक इजलासलाई एमिकस क्युरीकातर्फबाट राय दिँदै वैद्यले ७६ (२) को प्रधानमन्त्री रहेका केपी शर्मा ओलीले संसदमा विश्वासको मत नपाएपछि उनी पदबाट हटेको र ७६ (३) अनुसार प्रधानमन्त्री नियुक्ति गर्नै नमिल्ने दाबी गरेका हुन् ।
संसदले सत्ता चलाउन अयोग्य भनिसकेपछि उनको हैसियत यो राष्ट्रलाई चिनाउनुपर्ने भन्दै वैद्यले राष्ट्रपतिले अर्को अवतारमा आएको जसरी अर्को उपधाराअनुसार नियुक्त गर्नु गलत भएको बताए ।
विश्वासको मत गुमाएको प्रधानमन्त्रीको निकास के हो भन्ने राष्ट्रपतिले बुझ्नुपर्ने उल्लेख गर्दै वैद्यले राष्ट्रपतिले निकास नै नखोजेको बताए। पदमुक्त भएको प्रधानमन्त्रीको सट्टामा अर्को व्यक्तिलाई प्रधानमन्त्री नियुक्त गर्नुपर्ने राय दिँदै उनले नयाँ अवतारमा लगेर प्रधानमन्त्री नियुक्त गर्नै नमिल्ने दाबी गरे।
उनले भने, ‘अविश्वास भइसकेपछि उहाँलाई सत्तामा बस्न पाउँदैनौ भनेको हो, अर्को उपधाराअनुसार फेरि आउ भनेको होइन । फैसला हुँदा यो कुरा पनि स्मरण गराइयोस् ।
’
