अदालतले आफूलाई प्रधानमन्त्री बनाउने देउवाको विश्वास
काठमाडौँ । नेपाली कांग्रेसका सभापति शेरबहादुर देउवाले राष्ट्रपति विद्यादेवी भण्डारी केपी ओलीको कार्यकर्ताजस्तो बनेको आरोप लगाएका छन् । शनिबार पत्रकारहरुसँगको अन्तरक्रियामा सभापति देउवाले राष्ट्रपतिले प्रधानमन्त्रीको कार्यकर्ता भएर काम गरेको आरोप लगाएका हुन् ।
उनले आफूले बहुमत सांसदको समर्थनसहित प्रधानमन्त्रीमा दावी गर्दा कुनै समस्या परेको भए राष्ट्रपतिले सनाखत गर्नुपर्ने बताए ।
उनले भने,‘हामीले बहुमत सहित दावी गर्यौ । राष्ट्रपतिलाइ समस्या परेको भए सनाखत गरेको भए हुन्थ्यो । को कता छ भनेर सोधेको भए हुने । तर मध्यरातमा जे भयो गलत भयो ।’
सभापति देउवाले अदालतले आफूलाई नै प्रधानमन्त्री बनाउने विश्वास व्यक्त गरे । उनले भने,‘अदालतले शेरबहादुरलाई प्रधानमन्त्री बनाएर एक महिनाभित्र विश्वासको मत लिन लगाउन राष्ट्रपतिलाई आदेश गर्ने विश्वास छ ।’ माधव नेपाल लडाकु मित्र भएको भन्दै देउवाले उहाँमाथि धोका नहुने बताए ।
