भ्रममा नपरौं, दुई अध्यक्षबीच कुनै सहमति भएको छैनः प्रचण्डको सचिवालय
काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डको सचिवालयले दुई अध्यक्षबीच कुनै सहमति नभएको स्पष्ट पारेको छ । सचिवालयका तर्फबाट गंगा दाहालले शनिबार सामाजिक संजालमार्फत दुई अध्यक्षबीच कुनै सहमति नभएको जानकारी गराएकी हुन् ।
उनले लेखेकी छन्, ‘आज अध्यक्षद्वय बीच भएको छलफल पछि बसेको पार्टी सचिवालयको बैठकमा सहमति खोज्ने क्रममा विभिन्न बिषयहरु (महाधिवेशन लगायतका) मा छलफल भएता पनि कुनैपनि बिषयमा सहमति भएको छैन र सम्पूर्ण बिषयहरु छलफलकै क्रममा रहेकाले कोही पनि भ्रममा नपरौं ।’
दुई अध्यक्षबीच मंसिरमा महाधिवेशन गर्ने तथा माधव नेपाललाई बाइपास गर्ने लगायतका विषयमा सहमति भएको भन्दै समाचार सार्वजनिक भएपछि प्रचण्डको सचिवालयले त्यसको खण्डन गरेको हो । शनिबार बसेको सचिवालय बैठकमा सहमतिका लागि विभिन्न विकल्पमा छलफल भएपनि सहमति भने नजुटेको प्रवक्ता नारायणकाजी श्रेष्ठले जानकारी दिएका छन् । बैठक लगत्तै दुवै अध्यक्ष राष्ट्रपति विद्यादेवी भण्डारीलाई भेट्न शीतलनिवास पुगेका थिए । राष्ट्रपतिले दुवै अध्यक्षलाई सहमतिका साथ अघि बढ्न सुझाव दिएको बताइएको छ ।
