काठमाडौं उपत्यकामा ६ देखि १० हजार आइसोलेसन बेड निर्माण गर्ने सरकारको निर्णय
काठमाडौं । सरकारले कोरोना महामारीका कारण विदेशमा अलपत्र नेपालीलाई स्वदेश ल्याउने भएको छ । बिहीबार बसेको मन्त्रिपरिषद बैठकले स्वदेश आउन चाहने नेपालीलाई ल्याउने व्यवस्था गर्ने निर्णय गरेको हो ।
स्वदेश आउन चाहने नेपालीका लागि उडानको व्यवस्था गरिने तर नेपाल आएपछि भने उनीहरुले सात दिन क्वारेन्टिनमा बस्नुपर्नेछ । विदेशबाट आउनेहरुले आफ्नै खर्चमा क्वारेन्टिन बस्नुपर्नेछ । त्यसैगरी नेपालबाट विदेश जान समेत दिइने भएको छ । त्यो देशको अवस्था हेरेर जान चाहनेलाई नरोक्ने निर्णय बैठकले गरेको छ ।
त्यस्तै स्थलगत नाकाबाट आउनेहरुले पनि क्वारेन्टिनमा अनिवार्य बस्नुपर्ने छ । उनीहरुले पनि आफ्नै खर्चमा सात दिन क्वारेन्टिनमा बस्नुपर्नेछ । तर, पैसा तिर्न नसक्नेले भने सरकारले व्यवस्था गरेको ठाउँमा क्वारेन्टिनमा बस्नुपर्नेछ । बैठकले अहिले जारी गरिएको निषेधाज्ञालाई थप प्रभावकारी बनाउने निर्णय पनि गरेको छ ।
काठमाडौं उपत्यकामा ६ देखि १० हजार आइसोलेसन बेड निर्माण गर्ने पनि बैठकले निर्णय गरेको छ । निजी, सामुदायिक, सरकारी लगायत सबै अस्पतालमा आइसोलेसनको व्यवस्था गर्ने बैठकले निर्णय गरेको हो ।
