विधायन समितिको बैठकमा सांसदहरुले नै मास्क नलगाएपछि…..
काठमाडौं । संसदीय समितिमा केही सांसदले मास्क नलगाएपछि अर्का एक सांसदले मास्कको प्रयोग अनिवार्य गर्न समिति सभापतिको ध्यानाकर्षण गराएका छन् । बिहीबार बसेको राष्ट्रियसभा अन्तर्गतको विधायन व्यवस्थापन समितिमा सांसद जितेन्द्र नारायण देवले समिति बैठकमा बस्दा मास्क अनिवार्य गर्न सभापति परशुराम मेघी गुरुङको ध्यानाकर्षण गराएका हुन् ।
समितिमा रहेका विधेयकहरुलाई कसरी अघि बढाउने भन्ने बिषयमा छलफल गर्न बिहीबार बैठक बोलाइएको थियो । बैठकमा सभापति गुरुङ, समिति सचिव लगायत केही सांसदहरु मास्कविना बैठकमा सहभागी भएका थिए । सांसद देवले संवैधानिक आयोग, अदालत, सिंहदरबार सचिवालय लगायत कोरोनाबाट प्रभावित भएकाले समिति बैठक बस्दा सबैले मास्क लगाउनुपर्ने बताए ।
उनले मास्कबिना बैठकमा नबस्न सुझाव पनि दिए । देवले बैठकबस्दा स्वास्थ्य सतर्कता अपनाइ बस्नुपर्ने बताए । यसअघि संघीय संसद सचिवालयले सांसदहरुलाई कोरोना संक्रमणबाट बच्न पूर्व सतर्कता अपनाउन सुझाएको थियो । बैठकले मंसिर महिनाभित्रै समितिमा रहेका बिधेयकहरुको छलफल सक्ने र त्यसका लागि बिज्ञहरुको पनि सुझाव लिने निर्णय गरेको छ ।