ओमान र कुवेतमा रहेका नेपालीका बारेमा प्रधानमन्त्रीको चासो

काठमाडौं । प्रधानमन्त्री केपी शर्मा ओलीले ठूलो संख्यामा नेपाली कार्यरत खाडी क्षेत्रका नेताहरुसंग संवाद गर्ने क्रममा बुधबार साँझ ओमान सरकारका हिज हाइनेस शैयद फहाद वीन महमूद अल सइदसँग कुराकानी गरेका छन् । कुराकानीका क्रममा त्यहाँ कार्यरत नेपालीहरूलाई ओमानको सुरक्षा र सहयोग रही रहनेमा उहाँले आफूलाई निश्चिन्त पार्नुभएको प्रधानमन्त्रीले जानकारी दिएका छन् ।

नेपालीहरुले इमान्दार र परिश्रमीको रुपमा ओमानको विश्वास जितेको जानकारी पाउँदा आफूलाई खुशी लागेको प्रधानमन्त्रीले उल्लेख गरेका छन् । त्यस्तै बुधबार दिउँसो कुवेतका प्रधानमन्त्रीसँग भएको टेलिफोन संवादमा आफूले त्यहाँ कार्यरत नेपालीहरुको सुरक्षा र कल्याणको बारेमा आफ्नो चासो राखेको प्रधानमन्त्रीले जानकारी दिएका छन् ।

कुवेतका प्रधानमन्त्रीले नेपालीहरुलाई कुनै पनि अप्ठ्यारो पर्न नदिने र उनीहरुको उपचारमा खुल्ला दिलले सहयोग गर्ने प्रतिवद्धता व्यक्त गरेको प्रधानमन्त्रीले बताएका छन् । केही दिनदेखि प्रधानमन्त्रीले नेपाली कार्यरत विदेशी मुलुकका सरकार प्रमुखलाई टेलिफोन गरी नेपालीहरुको बारेमा चासो राख्दै आएका छन् । ।