अहिलेको सरकारले एमसिसीलाई अगाडि बढाउनेमा म विश्वस्त छुः सभापति देउवा
दाङ । नेपाली काँग्रेसका सभापति शेरबहादुर देउवाले एमसिसीलाई पार्टीले पूर्ण समर्थन गर्ने बताएका छन् । नेपाल प्रेस यूनियन दाङले आइतबार तुलसीपुरमा गरेको पत्रकार सम्मेलनमा सभापति देउवाले एमसिसी अमेरिकाको हालसम्मकै ठूलो सहयोग भएको हुँदा त्यसलाई फिर्ता जान दिन नहुने बताएका हुन् ।
कुनै पनि हालतमा यति ठूलो सहयोगको पैसा फिर्ता जान दिन नहुने मान्यतामा नेपाली कांग्रेस रहेको भन्दै सभापति देउवाले अहिलेको सरकारले पनि त्यसलाई अगाडि बढाउनेमा आफू विश्वस्त रहेको बताए ।
उनले भने, ‘एमसिसी म प्रधानमन्त्री हुँदा क्याबिनेटले पास गरेको कुरा हो’ देउवाले भने ‘अमेरिकाको यत्रो ठूलो रकम पहिलो पटक नेपालमा आएको हो, त्यसैले एमसिसी नेपालका लागि धेरै महत्वपूर्ण छ।’
एमसिसी पारित भए भोलि नेपालले भारतलाई विद्युत बेच्न सजिलो हुने देउवाले बताए । उनले बुटवलदेखि नयाँ दिल्लीसम्म भारतले ट्रान्समिसन लाइन बनाउन सुरु गरिसकेको बताए । त्यस्तै उनले त्यो रकमले नेपालको सडक निर्माण तथा विस्तारमा समेत सहयोग पुग्ने बताए ।
अहिलेको सरकारले कुनै पनि त्यस्तो उल्लेखनीय काम गर्न नसकेको भन्दै उनले सरकारका गलत कामको प्रतिपक्षीले सदनवाट विरोध गर्दै आएको बताए ।
