रुवाम्पारा । कङ्गोमा तीव्र रूपमा फैलिरहेको इबोला प्रकोप नियन्त्रणको प्रयासबीच उत्तरपूर्वी इटुरी प्रान्तस्थित रुवाम्पारा सामान्य अस्पतालको इबोला उपचार केन्द्रमा कार्यरत दर्जनौँ स्वास्थ्यकर्मीले दुई महिनादेखिको तलब र भत्ता नपाएको भन्दै हडताल गरेका छन् । यस घटनाले देशको इबोला नियन्त्रण अभियानमा थप चुनौती थपिएको छ ।
कङ्गोले गत मे महिनादेखि स्वीकृत उपचार वा खोप उपलब्ध नभएको इबोलाको दुर्लभ ‘बुन्डिबुग्यो’ प्रजातिविरुद्ध सङ्घर्ष गरिरहेको छ । गत साता स्वास्थ्यमन्त्री रोजर कम्बाले सङ्क्रमण थप दुई प्रान्तमा फैलिएको जानकारी दिएका थिए ।
प्रकोपको केन्द्र मानिएको रुवाम्पारा अस्पतालमा हडतालमा उत्रिनेहरूमा महामारीविद्, सङ्क्रमितको खोज तथा अनुगमनमा खटिएका कर्मचारी, चालक र शव व्यवस्थापनमा संलग्न कामदारसमेत छन् । उनीहरूले सरकारले तलब र भत्ता उपलब्ध नगराएको आरोप लगाएका छन् । प्रदर्शनका क्रममा उनीहरूले अस्पतालको सेवा अवरुद्ध पार्नुका साथै अस्पताल पुग्ने सडक बन्द गरी टायरसमेत जलाएका थिए ।
अस्पतालका स्वास्थ्यकर्मी बहती क्लाउडले दुई महिनासम्म तलब नपाउनु अस्वीकार्य भएको बताउँदै आफूहरूले काम रोक्न नचाहेको तर पारिश्रमिकबिना सेवा दिन नसकिने अवस्था आएको प्रतिक्रिया दिए । उक्त उपचार केन्द्र यसै महिनाको सुरुमा नयाँ उपचार विधिको अध्ययन सुरु गरिएको अर्को इबोला केन्द्र भन्दा फरक रहेको जनाइएको छ ।
विश्व स्वास्थ्य सङ्गठन (डब्लुएचओ) का अनुसार कङ्गोले मे १५ मा इबोला प्रकोपको औपचारिक घोषणा गरे पनि सङ्क्रमण त्यसअघि नै केही सातादेखि फैलिरहेको थियो । प्रारम्भिक परीक्षण अधिक सामान्य इबोला प्रकारका लागि गरिएकाले दुर्लभ ‘बुन्डिबुग्यो’ भाइरस पहिचान गर्न ढिलाइ भएको थियो ।
स्वास्थ्यमन्त्री कम्बाले सरकारले प्रकोप नियन्त्रणमा खटिएका कर्मचारीको नामावली पुनः प्रमाणीकरण गरिरहेको बताए । उनका अनुसार वास्तविक कर्मचारीबाहेक अन्य व्यक्तिका नाम पनि तलब सूचीमा समावेश भएकाले भुक्तानी प्रक्रियामा समस्या उत्पन्न भएको हो । वास्तविक कामदारसम्म रकम पुग्ने सुनिश्चित गरेर समस्या समाधान गरिने उनले बताए।
कङ्गोका अधिकारीहरूका अनुसार हालसम्म देशभर एक हजार ९२६ जनामा सङ्क्रमण पुष्टि भएको छ भने ७०२ जनाको मृत्यु भइसकेको छ ।
यसैबीच डब्लुएचओका महानिर्देशक टेड्रोस एड्हानोम गेब्रेयससले इबोलाबाट सङ्क्रमित दोस्रो अमेरिकी नागरिकलाई उपचारका लागि जर्मनी लगिएको जानकारी दिए।
सङ्क्रमित व्यक्ति पूर्वी कङ्गोमा कार्यरत एक मानवीय सहायताकर्मी हुन् । यसअघि प्रकोपको प्रारम्भिक चरणमा सङ्क्रमित भएका पहिलो अमेरिकी नागरिक पनि कङ्गोमै कार्यरत चिकित्सक थिए ।
प्रतिक्रिया