वासिङटन । अमेरिकी राष्ट्रपति डोनाल्ड ट्रम्पले अमेरिका र क्यानाडालाई जोड्ने नयाँ अन्तर्राष्ट्रिय पुलको उद्घाटनसम्बन्धी आफ्नो धारणा सार्वजनिक गरेका छन् । उनले क्यानाडासँगको व्यापारिक सन्तुलनका विषयमा सहमति नजुटेसम्म उक्त पुल सञ्चालनमा ल्याउने विषयमा पुनर्विचार आवश्यक रहेको उल्लेख गरेका छन् ।
राष्ट्रपति ट्रम्पका अनुसार पुलको स्वामित्व र यससँग सम्बन्धित विषयहरूमा अमेरिकाको हित सुनिश्चित हुनु आवश्यक छ । अमेरिकाले प्रदान गरेका सहुलियतहरूको उचित मूल्यांकन नभएसम्म पुल सञ्चालनबारे निर्णय गर्नु उपयुक्त नहुने उनको भनाइ छ ।
क्यानाडाको पहलमा निर्माण गरिएको उक्त पुलले दुई देशबीचको व्यापार र यातायातलाई सहज बनाउने अपेक्षा गरिएको थियो । लामो समयदेखि निर्माणाधीन पुल यसै वर्ष सञ्चालनमा ल्याउने तयारी गरिएको थियो ।
तर पछिल्लो अभिव्यक्तिपछि पुल सञ्चालनको विषयमा केही अन्योल देखिएको छ । यस घटनाले अमेरिका र क्यानाडाबीचको कूटनीतिक तथा व्यापारिक सम्बन्धमा थप छलफल र समन्वयको आवश्यकता देखाएको विश्लेषकहरूको धारणा छ ।
प्रतिक्रिया