किमको सुरक्षा टोली परिवर्तन

प्योङयाङ । उत्तर कोरियाली नेता किम जोङ उनले आफ्नो व्यक्तिगत सुरक्षाको जिम्मेवारी सम्हाल्ने तीन जना शीर्ष अधिकारीलाई हटाएर नयाँ नियुक्ति गरेका छन्। दक्षिण कोरियाली अधिकारीहरूका अनुसार किममाथि हुन सक्ने सम्भावित हत्या प्रयासको डर र सुरक्षा चिन्ता बढेका कारण यो कदम चालिएको हो। सियोलस्थित एकीकरण मन्त्रालयले किमको सुरक्षा हेर्ने तीनवटा मुख्य राज्य एजेन्सीका प्रमुखहरू परिवर्तन भएको पुष्टि गरेको छ।

यो सुरक्षा फेरबदल अक्टोबरमा आयोजित एक सैन्य परेडका क्रममा पहिलोपटक देखिएको थियो। विशेष गरी किमको ‘बडीगार्ड कमान्ड’ मा गरिएको परिवर्तनलाई अर्थपूर्ण रूपमा हेरिएको छ। यो निकाय ड्रोन आक्रमण वा आधुनिक इलेक्ट्रोनिक हमलाबाट नेता किमलाई जोगाउने जिम्मेवारीमा रहन्छ।

विश्लेषकहरूका अनुसार किमले युक्रेन युद्धमा रुसलाई सहयोग गर्न उत्तर कोरियाली सेना पठाउने निर्णय गरेपछि आफ्नो ज्यानमाथि जोखिम बढेको महसुस गरेका छन्। रुसमा सेना तैनाथीसँगै उनी अन्तर्राष्ट्रिय स्तरमा थप चर्चा र निशानामा पर्न सक्ने भएकाले सुरक्षा संरचनामा परिवर्तन गरिएको अनुमान छ।

दक्षिण कोरियाको जासुसी एजेन्सीले पनि किमको कार्यालयले सञ्चार अवरोध गर्ने र ड्रोन पहिचान तथा नियन्त्रण गर्ने अत्याधुनिक उपकरणहरू जुटाउन थालेको जानकारी दिएको छ।

अमेरिकाले भेनेजुएलाका राष्ट्रपति निकोलस मदुरोलाई पक्राउ गरेको घटनाले पनि प्योङयाङको नेतृत्वलाई झस्काएको विश्लेषकहरूको भनाइ छ। उत्तर कोरियाली नेतृत्वले लामो समयदेखि अमेरिकाले आफ्नो शासन हटाउन अचानक आक्रमण गर्न सक्ने डर मान्दै आएको छ।

पछिल्लो समय किम आफ्नी छोरी जु एईसँग विभिन्न आधिकारिक गतिविधिमा देखिने गरेका छन्। उनले आणविक पनडुब्बीको निरीक्षणदेखि सैन्य कार्यक्रमहरूमा छोरीलाई सँगै लैजाने गरेका छन्। यसलाई उनले आफ्नो उत्तराधिकारीका रूपमा छोरीलाई अघि सार्न खोजेको सङ्केतका रूपमा पनि लिइएको छ। सुरक्षा टोलीमा गरिएको यो व्यापक हेरफेरले उत्तर कोरियाली सत्ताभित्रको सुरक्षा सतर्कता उच्च बिन्दुमा पुगेको देखाउँछ।