गाजा । गाजा क्षेत्रमा भइरहेको भोकमरी र मानवीय संकट अत्यन्तै गम्भीर बन्दै गएको छ । संयुक्त राष्ट्रसंघको खाद्य कार्यक्रम संस्थाका आपतकालीन निर्देशक रॉस स्मिथले भने,’हामीले यो शताब्दीमा यति पीडादायक अवस्था देखेका थियैनौं । गाजामा अहिले भइरहेको भोकमरीले इथियोपिया र बियाफ्राको विगतका दुर्भिक्ष सम्झाइरहेको छ ।’
खाद्य सुरक्षा मूल्याङ्कन निकाय (आईपीसी) ले गाजाको अधिकांश क्षेत्रमा भोकमरीको अवस्था ‘गम्भीर तह’ पार गरिसकेको जनाएको छ ।
यदि तुरुन्तै राहत सामग्री सहज रूपमा गाजामा प्रवेश गर्न दिइएन भने, स्थिति झनै भयावह हुने स्पष्ट चेतावनी दिइएको छ ।
गाजा सहरमा पोषणको अवस्था पहिलोपटक दुर्भिक्षको सीमा पार गरेको रिपोर्टमा उल्लेख छ ।
संकटको सबैभन्दा कठोर मार महिला र बालबालिकामाथि परेको छ । संयुक्त राष्ट्रसंघको महिला संस्थाका अनुसार,’महिला आफ्ना नानीहरूलाई जोगाउन आफ्नो ज्यान जोखिममा राख्दै छन् । बालबालिका आमाको आँखा अगाडि भोकै मर्न बाध्य छन् ।’
हाल केही देशहरूले आकाशबाट राहत सामग्री खसाल्ने प्रयास गरेका छन्, तर संयुक्त राष्ट्रसंघका अधिकारीहरूले स्थलगत आपूर्तिलाई नै सबैभन्दा सुरक्षित उपाय मानेका छन् ।
अन्ततः, संयुक्त राष्ट्रसंघले सबै सरोकारवाला पक्षहरूलाई तत्काल सहयोग मार्ग खोल्न, स्थायी युद्धविराम सुनिश्चित गर्न र लाखौं निर्दोष नागरिकको जीवन रक्षाका लागि आवश्यक कदम चाल्न आग्रह गरेको छ ।
प्रतिक्रिया