पहलगाम आक्रमणपछि पाकिस्तानी सैन्य सल्लाहकारहरूलाई एक हप्ता भित्र भारत छोड्न निर्देशन
नयाँदिल्ली । भारतले पहलगाम आक्रमणपछि पाकिस्तानविरुद्ध कडा कदम चालेको छ । बुधबार बसेको सुरक्षा सम्बन्धी मन्त्रिपरिषद् बैठकले पाकिस्तानसँगको सिन्धु जल सन्धि स्थगित गर्ने, भारतमा रहेका सबै पाकिस्तानी सैन्य सल्लाहकारहरूलाई एक हप्ता भित्र भारत छोड्न निर्देशन दिने र भारतले पनि आफ्ना सल्लाहकारहरूलाई फिर्ता बोलाउने निर्णय गरेका छ ।
त्यसैगरी बैठकले पाकिस्तानीहरूको भिसा रद्द गर्ने र अटारी सीमा चौकी बन्द गर्ने निर्णय गरेको छ । सरकारले बिहीबार सर्वदलीय बैठक बोलाएको छ। पहलगाम आक्रमणमा २६ जनाको मृत्यु भएको छ। तीमध्ये एक जना नेपाली नागरिक छन् ।
२० भन्दा बढी घाइते भएका छन्। अप्रिल २२ मा बैसरन उपत्यकामा ठूलो संख्यामा पर्यटकहरू उपस्थित भएको बेला आक्रमण गरिएको थियो । यसैबीच, सुरक्षा र गुप्तचर निकायहरूले पहलगाम आक्रमणका संदिग्ध आतंककारीहरूको स्केच जारी गरेका छन्।
उनीहरूको नाम आसिफ फौजी, सुलेमान शाह र अबु तल्हा दिइएको छ । गुप्तचर स्रोतहरूले आक्रमणको मास्टरमाइन्ड लश्कर–ए तैयबाका उपप्रमुख सैफुल्लाह खालिद रहेको बताएका छन् ।
