फ्रान्स र बेलायतका सैन्य प्रमुखहरूको युक्रेनी नेतासँग विकल्पहरूबारे छलफल
वासिङटन । बेलायती र फ्रान्सेली सेना प्रमुखहरूले युक्रेनी सेनालाई बलियो बनाउन र रुससँगको शत्रुता अन्त्य भएपछि युद्धग्रस्त देशलाई सहयोग गर्ने तरिकाहरूबारे छलफल गर्न यस हप्ता किएभको यात्रा गरेको फ्रान्सका थिएरी बुर्खार्डले बताएका छन् ।
शुक्रबार बुर्खार्ड र बेलायती रक्षा प्रमुख टोनी राडाकिनले युक्रेनी राष्ट्रपति भोलोदिमर जेलेन्स्की, युक्रेनी सेनाप्रमुख ओलेक्जान्डर सिस्र्की र रक्षामन्त्री रुस्तेम उमेरोभसँग वार्ता गरे ।
फ्रान्सका राष्ट्रपति इमानुएल म्याक्रोन र बेलायती प्रधानमन्त्री किर स्टार्मरले सन् २०२२ मा रुसको आक्रमणबाट सुरु भएको युद्धको कुनै पनि अन्त्यपछि युक्रेनमा ‘आश्वासन बल’ पठाउने युरोपेली प्रयासको नेतृत्व गरिरहेका छन् । युक्रेनले रुसले युद्धविराम नचाहेको बताएको छ ।
फ्रान्सेली र बेलायती सैन्य प्रमुखहरूको किएभ भ्रमण त्यही दिन भएको थियो जुन दिन रुसको बालिस्टिक मिसाइल आक्रमणमा जेलेन्स्कीको गृह सहर क्रिभी रिगमा नौ बालबालिकासहित कम्तीमा १८ जनाको मृत्यु भएको अधिकारीहरूले बताए ।
जेलेन्स्कीले बुर्खार्ड र राडाकिनसँगको बैठकलाई ‘आधारभूत’ भन्नुभएको छ । “हामी जमिन, आकाश र समुद्रमा उपस्थितिको बारेमा छलफल गरिरहेका छौँ । हामी हवाई रक्षाबारे पनि छलफल गरिरहेका छौँ र केही अन्य संवेदनशील कुराहरू पनि छन्”, उनले भने, “हामी हरेक हप्ता हाम्रो सैन्यस्तरमा भेट्नेछौँ । युक्रेनलाई के चाहिन्छ भन्नेबारे हाम्रा साझेदारहरूसँग पहिले नै धेरै बुझाइ छ ।”
फ्रान्सेली सशस्त्र बलका प्रमुख बुर्खार्डले शनिबार उनीहरूले अन्तर्राष्ट्रिय गठबन्धनले प्रदान गर्ने ‘आश्वासन विकल्पहरू’ बारे छलफल गरेको बताए ।
“सँगै, हामी युक्रेनमा स्थायी र ठोस शान्तिको ग्यारेन्टी गर्न चाहन्छौँ, जुन युरोपेली महाद्वीपको सुरक्षाका लागि आवश्यक शर्त हो”, उनले भने ।
उनकाअनुसार संयुक्त यात्राको लक्ष्य युक्रेनी सेनाका लागि ‘दृढ समर्थन कायम राख्ने’ थियो जसले यसलाई रुसी बलहरू विरुद्ध लड्न जारी राख्न अनुमति दिनेछ । अर्को लक्ष्य ‘सेनाको पुनर्निर्माण र रूपान्तरणका लागि दीर्घकालीन रणनीति परिभाषित गर्ने’ रहेको उनले बताए ।
