दक्षिण सुडानमा तत्काल युद्ध अन्त्य गर्न अफ्रिकी सङ्घको आग्रह

आदिस अबाबा । अफ्रिकी युनियन (एयू) आयोगका प्रमुख मोसा फकी महामतले दक्षिण सुडानमा भइरहेको युद्ध तत्काल अन्त्य गर्न आह्वान गरेका छन् ।

“झडपहरूमा संयुक्त राष्ट्रको हेलिकप्टरमा घातक आक्रमण र अन्य क्षेत्रहरूमा हिंसा समावेश छ, जसले शान्ति प्रक्रियामा खतरा निम्त्याउँछ ।”

जिम्मेवार व्यक्तिहरूलाई पूर्ण रूपमा जवाफदेही बनाउन अधिकारीहरूलाई आग्रह गर्दै उनले सबै पक्षहरूलाई अत्यन्त संयम अपनाउन, तत्काल शत्रुताको अन्त्य गर्न, युद्धविरामको व्यवस्थाको पालना गर्न र राष्ट्रिय वार्तामा संलग्न हुन आग्रह गरे ।

“एयूले हाल दक्षिण सुडानी अधिकारी र अन्य सरोकारवालाहरूसँग सङ्कट कम गर्न प्रयासहरू समन्वय गर्न परामर्श गरिरहेको छ ।”

शुक्रबार दक्षिण सुडानका राष्ट्रपति साल्भा किरले शान्तिको अपील गर्दै शान्तिप्रति आफ्नो प्रतिबद्धता दोहोर्याएका छन् । नासिर काउन्टीमा सरकारी सेना र संयुक्त राष्ट्रसङ्घको हेलिकोप्टरमा भएको हिंस्रक आक्रमणमा २७ जनाको मृत्यु भएको थियो ।